18 aprel 2018–ci il tarixində AMEA N.Tusi adına Şamaxı Astrofizika Rəsədxanasının (ŞAR) Bakı bölməsində növbəti astroseminar keçirilib.

Tədbiri giriş sözü ilə açan Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov astroseminar haqqında seminar iştirakçılarına məlumat verib.

Sonra ŞAR-ın “Qoşa ulduzlar və eruptiv proseslər “ şöbəsinin müdiri, f.r.ü.f.d., dos. Bayram Rüstəmov ( N.S.Cəlilov, X. M.Mikayılov, O.V.Xəlilov) "GAIA (Global Astrometric Interferometer for Astrophysics) kosmik teleskopu. I. Kosmik missiyanın elmi məqsədi və aparılan astrofiziki müşahidələr haqqında qısa icmal “ mövzusunda məruzəsini təqdim edib. 

Məruzəçi qeyd edib ki, Avropa Kosmik Agentliyinin bu unikal teleskop layihəsində məqsəd: 20-ci ulduz ölçüsünə qədər bir milyard ulduzun dəqiq yerini müəyyən edib kataloqlaşdırmaq, həmin ulduzların astrometrik, spektral və fotometrik müşahidələrini aparmaq, ulduzların və bizim qalaktikada nəhəng qalaktik strukturların hərəkət sürətlərini ölçmək və nəhayət qalaktikanın bizə aid hissəsinin üçölçülü xəritəsini tərtib etməkdir. Məruzəçi kosmik teleskopda quraşdırılmış əsas müşahidə qurğuları və işıqqəbulediciləri barədə geniş informasiya verib.

Sonda alim qeyd edib ki, məruzənin ikinci hissəsində AMEA ŞAR-ın mövcud elmi və texniki potensialı çərçivəsində bu Beynəlxalq proqrama qoşulmaq imkanları araşdırılacaq.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.