Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasının (ŞAR) Gənc Alim və Mütəxəssislər Şurasının (GAMŞ) gənc tədqiqatçılar üçün növbəti ustad dərsi keçirilib.

Tədbiri ŞAR GAMŞ-ın sədr müavini Aytac İskəndərova giriş sözü ilə açaraq, iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın "Ulduz atmosferləri fizikası və maqnetizm" şöbəsinin aparıcı elmi işçisi, fizika üzrə fəlsəfə doktoru, dosent Əliqulu Xəlilov "İfratnəhəng ulduzlar və onların atmosferində baş verən qeyri-stasionar proseslər" mövzusunda məruzə ilə çıxış edib.

Məruzəçi qeyd edib ki, nəhəng və ifratnəhəng ulduzlar onların daxilində baş verən fiziki proseslər nəticəsində pulsasiya edir və fasiləsiz olaraq maddə itirir. Onlarda baş verən pulsasiya haqqında müşahidələrdən alınmış məlumatlar və yaxud onların atmosferində baş verən irimiqyaslı qeyri-müntəzəm proseslərin izahı həm müşahidə, həm də nəzəri cəhətdən olduqca müxtəlifdir. Ona görə belə ulduzların spektrlərində müşahidə olunan hidrogenin Balmer seriyasının Hα, Hβ, Hγ, Hδ və digər elementlərin, məsələn: HeI, dublet NaI D, Fe və s. spektral xətlərinin araşdırılması müasir astrofizikada mühüm əhəmiyyət kəsb edir.

Tədbir iştirakçıları tərəfindən maraqla qarşılanan məruzənin sonununda mövzu ətrafında geniş diskussiya aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.