14 oktyabrda Tusi-Bohm Planetariumunda “Astronomiya Olimpiadaları: Məsələlər və onların həlləri” kitabının Azərbaycan dilində nəşrinin təqdimatı keçirilib. Təqdimat zamanı kitabın məzmunu və məqsədi, eləcə də ölkəmizdə astronomiyanın təbliği sahəsində görülən işlər və gələcək planlar haqqında məlumat verilib.
Tədbiri giriş sözü ilə açan Tusi-Bohm Planetariumunun rəhbəri Famil Mustafa Azərbaycan dilində keyfiyyətli dərs vəsaitlərinə böyük ehtiyac olduğunu vurğulayıb. Bildirib ki, astronomiyanın tədrisində ana dilli materialların çatışmazlığı özünü aydın göstərir. Son illərdə müasir ədəbiyyatın tərcüməsinə ciddi ehtiyac yaranıb. Biz bu boşluğu doldurmağa və istifadə etdiyimiz qaynaqları doğma dilimizə çevirməyə çalışırıq. Kitab astronomiya fənnindən olimpiadalara hazırlaşan məktəblilər və universitet tələbələri üçün nəzərdə tutulub. Hər il Məktəblilərarası Astronomiya Olimpiadasında Azərbaycan da iştirak edir. Keçən il Hindistanda keçirilən olimpiadada komandamız bürünc medal qazanıb. Bu uğur astronomların məktəblilərlə planlı və məqsədyönlü işinin bəhrəsidir.
Tədbirdə çıxış edən Şamaxı Astrofizika Rəsədxanasının “Qalaktikalar və ulduzəmələgəlmə prosesləri” şöbəsinin müdiri, f.r.f.d., dosent Nazim Hüseynov isə bildirib ki, ulduzlar, kainatın quruluşu, əsas astrofiziki proseslər barədə fundamental biliklərə yiyələnmək üçün tədris prosesində dərslik və vəsaitlərə müraciət zəruridir. Lakin onların yalnız xarici dildə olması həm tələbələr, həm də müəllimlər üçün əlavə çətinlik yaradır. Bu tərcümə də həmin problemi aradan qaldırmaq məqsədi daşıyır.
Vladimir G. Surdinin “Astronomiya Olimpiadaları: Məsələlər və onların həlləri” toplusu 2018–2021-ci illərdə rus dilində nəşr olunmuşdur və olimpiada tipli sual-cavabların ardıcıl məntiqini, həll metodlarını, həmçinin müəllim və şagirdlər üçün praktik tövsiyələri özündə cəmləyir. Kitabın Azərbaycan dilinə tərcümə və redaktə işləri Şamaxı Astrofizika Rəsədxanasının əməkdaşları Nazim Hüseynov, Kamal Hüseynov və Famil Mustafa tərəfindən icra olunmuşdur.
Tədbirin sonunda qonaqlar “Kosmik Toqquşmalar” filmini izləyiblər, iştirakçılara kitab hədiyyə olunub və xatirə şəkli çəkilib.
Qeyd edək ki, kitab Həvəskar Astronomlar Cəmiyyəti tərəfindən, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Azərbaycanda Astronomiya Təhsilinin Təşviqi” layihəsi çərçivəsində tərcümə olunub.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
