Sentyabrın 18-də N.Tusi adına Şamaxı Astrofizika Rəsədxanasının (ŞAR) Gənc Alim və Mütəxəssislər Şurasının (GAMŞ) ilin son rübü ilə bağlı iclası baş tutub.

İclası ŞAR GAMŞ-ın sədri Samirə Rəhimli açaraq, iclasın gündəliyi barədə iştirakçılara məlumat verib.

İlk olaraq ŞAR-ın icraçı direktoru Nəriman İsmayılova söz verilib və professor gənclərə yaradılan imkanlardan danışıb, rəhbərliyin onların təşəbbüslərinə hər zaman açıq olduğunu bildirib. O, gənc mütəxəssislərin birgə elmi və ictimai fəaliyyətinin vacibliyini vurğulayıb.

Zoom platforması üzərindən keçirilən iclasda 2025-ci ilin son rübündə həyata keçiriləcək əsas fəaliyyət planı və tədbirlər siyahısı təqdim olunub. Bildirilib ki, ŞAR-ın gənc əməkdaşları hər zaman olduğu kimi beynəlxalq konfrans və müsabiqələrdə fəal iştirak edəcək, həmçinin astronomiyanın məktəblərdə və KİV-də geniş təbliği əvvəlki kimi davam etdiriləcəkdir.

İclasda GAMŞ seminar rəhbərinin dəyişdirilməsi məsələsi də müzakirə olunub və Aytac İskəndərova yekdilliklə yeni seminar rəhbəri seçilib.

Sonda isə seminarların və ustad dərslərinin cari durumu müzakirə olunaraq, daha müntəzəm və ardıcıl keçirilməsi ilə bağlı idarə heyətinə tapşırıqlar verilib.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.