Kosmik hava durumu – Hesabat dövrü ərzində Günəşin fəallığı qismən zəifləmişdir. Maksimal sinifli alışma isə 4207 oblastındakı M1.4 sinifli alışma olmuşdur. Alışmalara bağlı olaraq radio rabitədə R1 səviyyəli fasilələr qeydə alınmışdır. Günəşin səthində ləkələrin sayı azalaraq 6ləkə qrupunda 83 ləkə və hər iki yarımkürədə böyük Tac dəliyi müşahidə olunur.

Enerjisi 2 MeV-dən çox olan elektron seli normal və orta səviyyədə olmuşdur. 10 MeV-dən çox enerji yüklü proton seli isə 01 sentyabrda S1 səviyyəsinədək yüksəlmişdir.

Hesabat dövründə Günəş küləyinin maksimal sürəti 806 km/san–dək artmışdır. Yer orbitində planetlərarası maqnit sahəsinin maksimal qiyməti 27 nT, radial istiqamətdə isə -23 nT olmuşdur. Hal-hazırda Günəş küləyinin sürəti 598 km/san planetlərarası maqnit sahəsinin maksimal qiyməti 6.35 nT, radial istiqamətdə isə -0.7 nT təşkil edir.

Hesabat dövründə gözlənilən Tac Kütlə Atılmalarının və Tac Dəliyinin təsiri ilə 01-03 sentyabr tarixlərində G1-G2 səviyyəli geomaqnit qasırğası qeydə alınmışdır. Hal-hazırda Kp indeksinin göstəricisi  3.3-dür və kosmik hava qeyri-sabitdir.  

Kosmik hava proqnozu – Proqnoz günlərində (08-14 sentyabr) C sinif alışmanın baş verməsi ehtimalı 99%, M (R1-R2) sinif alışmanın baş verməsi ehtimalı 25%, X (R3) sinif alışmanın baş verməsi ehtimalı isə 1% təşkil edir.

Enerjisi 2 MeV-dən çox olan elektron selinin 08-10 sentyabrda yüksələcəyi, 10 MeV-dən çox enerji yüklü proton selinin isə fon səviyyəsində olacağı gözlənilir.

Günəş küləyinin müsbət qütblü Tac Dəliyi Axınlarının təsiri ilə sürətinin yenə də yüksək olacağı gözlənilir.

Geomaqnit sahəsinin fəallığı ilə əlaqədar avroral oval orta enliklərə qədər genişlənib.

Avroraların müşahidə olunması ehtimalı isə yüksək qütb dairələrində 15-40%, orta qütb dairələrində isə 30-1%-dir.

Geomaqnit sahəsi – müsbət qütblü Tac Dəliyi Axınlarınının təsiri ilə sakit və qeyri-sabit səviyyələr arasında olacağı gözlənilir.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.