04-05 sentyabr 2025-ci il tarixlərində Azərbaycan Respublikası Elm və Təhsil Nazirliyinin N.Tusi adına Şamaxı Astrofizika Rəsədxanası (ŞAR) tərəfindən təşkil olunmuş “Astronomiya və astrofizikanın aktual problemləri” adlı I Respublika Konfransı öz işini uğurla başa vurub. Şamaxı Astrofizika Rəsədxanasının Y. Məmmədəliyev qəsəbəsindəki inzibati binasında keçirilən tədbirdə bir çox universitet və elmi müəssisələrin nümayəndələri, həmçinin dəvət olunmuş qonaqlar iştirak edib.
İki gün ərzində 6 bölmə üzrə elmi məruzələr təqdim olunub. Astrofizikanın müxtəlif sahələrinə dair nəzəri tədqiqatlar, ulduz astrofizikası, dəyişən ulduzlar, Günəş və Günəş sistemi cisimləri, nəhəng planetlər, qalaktikadankənar obyektlər (qalaktikalar, kvazarlar, qamma-şüa mənbələri), astronomik müşahidələr və metodlar, kosmik rəsədxanalar, Azərbaycanda astronomiya elmi irsi və biliklərin ötürülməsi mövzuları üzrə ümumilikdə 54 məruzə dinlənilib. Paralel olaraq konfrans çərçivəsində “Nonclassical Models on Modern Mathematical Physics and its Applications to Physics, Aerodynamics, Astrophysics and Stellar Astronomy” adlı vörkşop keçirilib. Vörkşopda müasir riyazi-fizikanın qeyri-klassik modellərinin astrofizikaya tətbiqi məsələləri müzakirə edilib.
Konfransda həmçinin bu il 70 yaşı tamam olan, uzun illər səmərəli fəaliyyəti ilə seçilən və Azərbaycan və dünya astronomiya elminə özünəməxsus töhfələr vermiş görkəmli astronom alimlərin - müxbir üzvlər Namiq Cəlilov və Əyyub Quliyev, professor Nəriman İsmayılov, astronomiya elmləri doktoru Zahir Səmədov, fizika-riyaziyyat üzrə fəlsəfə doktorları Bayram Rüstəmov, Əliqulu Xəlilov, Nazim Hüseynov və Bahadır İsmayılovun yubileyləri qeyd olunub. Onların yetirmələri tərəfindən alimlərin həyat və yaradıcılığı haqqında çıxışlar edilib və yubilyarlara ŞAR Həmkarlar İttifaqı Təşkilatı tərəfindən xatirə hədiyyələri təqdim olunub.
Tədbirin sonunda isə konfransda məruzə ilə çıxış edən hər bir iştirakçı sertifikatla təltif olunub.
Qeyd edək ki, təqdim olunmuş elmi məruzələrin toplusunu ehtiva edən konfrans materiallarının ilin sonunadək xüsusi buraxılışla dərc olunması nəzərdə tutulub.
© Bütün hüquqlar qorunur. Xəbərlərdən istifadə edərkən www.shao.az saytına istinad olunması zəruridir.
