Hindistanın Mumbay şəhərində keçirilən Beynəlxalq Astronomiya və Astrofizika Olimpiadasında (IOAA 2025) məktəblilərimiz 2 bürünc medal, həmçinin 2 həvəsləndirici mükafata layiq görülüblər.
Nəzəriyyə, data analiz, gecə müşahidəsi və planetarium kimi turlardan ibarət olan olimpiadada Bakı şəhəri Fizika, riyaziyyat və informatika təmayüllü liseyin XI sinif şagirdi Oqtay Lətifli və Bakı şəhəri Texniki humanitar liseyinin X sinif şagirdi Məhəmməd Cəfərli bürünc medala, Bakı şəhəri Fizika, riyaziyyat və informatika təmayüllü liseyin X sinif sinif şagirdi Raiq Babazadə və XI sinif şagirdi Aqil Güləliyev olimpiadanın həvəsləndirici mükafatına layiq görülüblər. Əlavə olaraq, komanda üzvü Oqtay Lətifli dünyanın 10 ən yaxşı universitetlərindən biri olan “University College London"-a Astrofizika ixtisası üzrə qəbul olunub və Dövlət Proqramı çərçivəsində təqaüdlə təhsil almaq şansı qazanıb.
Qeyd edək ki, Beynəlxalq Astronomiya və Astrofizika Olimpiadasına hazırlıq Şamaxı Astrofizika Rəsədxanasının, Bakı Dövlət Univeristetinin, Respublika Uşaq-Gənclər İnkişaf Mərkəzinin və Tusi-Bohm Planetariumun dəstəyi ilə təşkil edilib. Hazırlıq proqramının sonunda rəsədxanada komanda üzvlərinin də iştirakı ilə düşərgə təşkil olunmuş, onlara teleskopların iş prinsipi izah edilmiş və gecə müşahidələrində iştirak etmişdilər.
Komandanın XVIII Beynəlxalq Astronomiya və Astrofizika Olimpiadasında iştirakı Azərbaycan Respublikasının Təhsil İnstitutu tərəfindən təmin edilib.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
