Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.
Seminara rəhbərlik edən ŞAR-ın icraçı direktoru, professor Nəriman İsmayılov iştirakçıları salamlayıb və onlara məruzənin mövzusu haqqında məlumat verib.
Sonra ŞAR-ın “Planetlər və kiçik səma cisimləri” şöbəsinin elmi işçisi Zabit Fərziyev “Uran və Neptun planetlərinin atmosferində fırlanma temperaturun təyini” mövzusunda məruzə ilə çıxış edib.
Məruzəçi bildirib ki, Uran və Neptun planetlərinin görünən oblastdakı spektrində müşahidə olunan güclü udulma zolaqları əsasən metan qazına mənsubdur. Hər iki planetin spektrində CH4 qazının udulma zolaqlarının olmasi bu planetlərin atmosferində temperaturun T>-182.5 O C (metan qazının ərimə nöqtəsi) olmasını göstərir. Həmçinin, məlumdur ki, Uran və Neptun planetlərinin Günəşdən aldıqları enerjiyə görə effektiv temperaturu 49-57 K (P=0.1 bar olanda) intervalında dəyişir. Bu planetlərin atmosferində CH4 udulma xətlərinin formalaşdığı dərinlikdə temperaturun hansı qiymətə malik olması alimlərdə böyük maraq doğurmuş və bu sahədə tədqiqatlar aparılmışdır. Bizim tərəfimizdən də bu planetlərin spektrində CH4 λ 6800 5ν 3 udulma zolağının fırlanma keçidləri zamanı yaranan R qanadının udulma xətlərinin intensivliklərinə əsasən atmosferin fırlanma temperaturunun qiyməti təyin edilmişdir. Tədqiqat işində Şamaxı Astrofizika Rəsədxanasının 2-m teleskopunun Kasseqren fokusunda optik lifli eşelle spektrometrində R=28000 ayırdetmə ilə Uran və Neptun planetlərinin alınmış spektrlərindən istifadə edilmişdir. Alınmış eşelle spektrlərin emalı DECH proqram paketinin köməyi ilə aparılmışdır. Əldə edilmiş nəticələr digər tədqiqatçıların aldıqları nəticələrlə müqayisəli şəkildə təhlil edilmişdir.
Çıxışın sonunda mövzu ətrafında geniş müzakirə aparılıb, seminar iştirakçılarını maraqlandıran suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
