Beynəlxalq Astronomiya İttifaqının (BAİ) qərarına əsasən kiçik planetlərdən birinə məşhur astrofizik alim, fizika-riyaziyyat elmləri namizədi Faiq Musayevin adı verilib.
Kataloq nömrəsi 553035 olan asteroid 10 yanvar 2011-ci il tarixində Timur Kryaçko və Boris Satovski tərəfindən Zelençuk stansiyasında kəşf edilib. Hərəkət zonası Mars və Yupiter planetlərinin arasındakı asteroid qurşağı olan bu kiçik planet cari ilin birinci rübünədək şərti olaraq 2011 AM34 adlandırılıb.
Faiq Adil oğlu Musayev 19 avqust 1959-cu ildə Azərbaycan Respublikasının Quba rayonunda anadan olmuşdur. O, 1981-ci ildə Azərbaycan Dövlət Universitetinin (Bakı Dövlət Universiteti) fizika fakültəsini bitirmiş və gənc mütəxəssis kimi Kosmik Tədqiqatlar İnstitutunda əmək fəaliyyətinə başlamışdır.
1982-ci ildən Şamaxı Astrofizika Rəsədxanasında elmi işçi vəzifəsinə işə qəbul edilmişdir. Burada uzun illər boyunca elmi fəaliyyətlə məşğul olmuş alim, 1992-ci ildə dünyanın ən məşhur astrofizika mərkəzlərindən biri olan Rusiya Elmlər Akademiyasının Xüsusi Astrofizika Rəsədxanasında dissertasiya işini uğurla müdafiə edərək fizika-riyaziyyat elmləri namizədi elmi dərəcəsini almışdır.
1995-ci ildən öz xahişi ilə Şamaxı Astrofizika Rəsədxanasından işdən çıxmış və həmin ildən Xüsusi Astrofizika Rəsədxanasında elmi fəaliyyətini davam etdirmişdir. Faiq Musayev, orada fəaliyyət göstərdiyi müddət ərzində teleskoplar üçün spesifik elektron işıqqəbuledicilərinin yığılması ilə bağlı böyük təcrübə qazanmış, optik cihazların yığılmasında yüksək kvalifikasiyalı eksperimentator-spektroskopist kimi özünü təsdiq etmişdir. Onun Rusiya, Polşa, Bolqarıstan və Türkiyə kimi ölkələrin Rəsədxanalarındakı teleskoplar üçün yığdığı cihazlar böyük müvəffəqiyətlə sınaqdan keçmiş və özünü doğrultmuşdur. Alimin hazırladığı cihazlarda alınmış yüksək keyfiyyətli müşahidə materialları əsasında müxtəlif müəlliflər tərəfindən maraqlı nəticələr alınmışdır.
Qeyd edək ki, Faiq Musayevin Şamaxı Astrofizika Rəsədxanası ilə Xüsusi Astrofizika Rəsədxanası arasında əlaqələrin genişləndirilməsində, Rəsədxana teleskoplarında qurulan optik cihazların hazırlanmasında da xüsusi xidmətləri olmuşdur.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
