Aprelin 12-də AMEA N.Tusi adına Şamaxı Astrofizika Rəsədxanasının (ŞAR) Bakı bölməsində növbəti astroseminar keçirilib.

Tədbiri giriş sözü ilə açan Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov astroseminar haqqında tədbir iştirakçılarına məlumat verib.

Sonra ŞAR-ın “Kosmik plazma və Heliogeofiziki problemlər”şöbəsinin kiçik elmi işçisi Rəcəb İsmayıllı "Anitotrop Günəş küləyi plazmasında maqnit-hidrodinamik Kelvin-Helmholts dayanıqsızlığı (KHD)" mövzusunda (N.S.Cəlilov, R.F.İsmayılov) məruzəsini təqdim edib.

Məruzəçi bildirib ki, Kelvin Helmholtz dayanıqsızlığı astrofizikada və geofizikada mühüm proseslərdən biridir. Bu tip dayanıqsızlıq son illər həm nəzəri həm də təcrübi olaraq günəş tacında, ionosferdə və digər astrofiziki obyektlərdə geniş şəkildə öyrənilmişdir.

R.İsmayılov vurğulayıb ki, məruzə olunan işdə müxtəlif sürətli günəş küləyi hallarında Kelvin Helmholtz dayanıqsızlığının tətbiqi üçün 16 momentli MQD köçürmə tənliklər sistemi tətbiq olunub...

“Görülən işlər onu göstərir ki, Günəş küləyində KHD-ı sürətli inkişaf edən dayanıqsızlıqlardan biridir. Bu dayanıqsızlığın güclənməsi kinetik enerji burulğanlarının kinetik enerjiyə çevrilməsinə səbəb ola bilər, yəni turbulensiyanın enerji mənbəyi rolunu oynaya bilər.”.

Məruzə tədbir iştirakçıları tərəfindən maraqla qarşılanıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.