Kosmik hava durumu – Hesabat dövrü ərzində Günəş fəallığı artmışdır, maksimal sinifli alışma isə 4114 oblastındakı X1.9 sinifli alışma olmuşdur. Alışmalara bağlı olaraq radio rabitədə R1-R3 səviyyəli fasilələr, II-IV tip radio emissiya qeydə alınmışdır. Günəşin səthində ləkələrin sayı azalaraq 5 ləkə qrupunda 87 ləkə və transekvatorial böyük Tac dəliyi müşahidə olunur. 

Enerjisi 2 MeV-dən çox olan elektron seli hesabat dövrü ərzində orta və yüksək səviyyədə (1228 pfu), 10 MeV-dən çox enerji yüklü proton seli isə fon səviyyəsində olmuşdur. 

Hesabat dövründə Günəş küləyinin maksimal sürəti 692 km/san-dək artmış və daimi normadan yüksək olmuşdur. Yer orbitində planetlərarası maqnit sahəsinin maksimal qiyməti 18 nT, radial istiqamətdə isə -16 nT olmuşdur. Hal-hazırda Günəş küləyinin sürəti 454 km/san planetlərarası maqnit sahəsinin maksimal qiyməti 6.06 nT, radial istiqamətdə isə 0.72 nT təşkil edir. 

Hesabat dövründə 11-14 iyun tarixlərində və əsasən Tac Dəliklərinin və Tac Kütlə Atılmalarının təsiri ilə G1-G2 səviyyəli geomaqnit qasırğası müşahidə olunmuşdur. 4114 oblastının çox aktiv olmasına və ardıcıl olaraq M və X sinif alışmalar qeydə alınmasına baxmayaraq Yerə təsir edəcək güclü plazma seli qeydə alınmamışdır.

Kosmik hava proqnozu – Proqnoz günlərində (23-29 iyun) C sinif alışmanın baş verməsi ehtimalı 95%, M (R1-R2) sinif alışmanın baş verməsi ehtimalı 45%, X (R3) sinif alışmanın baş verməsi ehtimalı isə 10% təşkil edir.

Enerjisi 2 MeV-dən çox olan elektron və 10 MeV-dən çox enerji yüklü proton selinin aktiv regionlara bağlı olaraq səviyyələrinin yüksəlməsi ehtimalı var.    

Günəş küləyi sürətinin  müşahidə olunan Tac Dəliyinə bağlı olaraq normadan yüksək qalacağı gözlənilir.

Avroraların müşahidə olunması ehtimalı isə yüksək qütb dairələrində 15-40%, orta coğrafi enliklərdə isə 30-1%-dir.

Geomaqnit sahəsi – müşahidə olunan transekvatorial Tac Dəliyinin təsiri ilə 24-25 iyunda  G1 (zəif qasırğa) səviyyəli geomaqnit qasırğası olması ehtimalı var. 

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.