Avropa Kosmik Agentliyi (ESA) potensial təhlükəli asteroidləri aşkarlamaq üçün məhz böcəklərin gözünün anatomik quruluşu əsasında hazırlanmış teleskopunu işə salır. “Flyeye” yəni "Milçək gözü" adı verilmiş teleskop bir optik kanal əvəzinə eyni zamanda səmanı izləyən 16 kanallı qəbuledici ilə təchiz olunmuşdur. Nəticədə teleskopun 1 m-lik güzgüsü 16 kanallı qəbuledicilər sayəsində hətta çox zəif və sürətli obyektləri aşkar etməyə qadirdir. Teleskopun 45 kv. dərəcəlik görüş sahəsi səmada Ay diskindən 200 dəfə böyük sahəni müşahidə etməyə imkan verir. Bu isə eyni zamanda daha çox göy cisminin müşahidəsi imkanı deməkdir.
“Flyeye” tam avtomatlaşdırılıb və hər gecə səmanı insan müdaxiləsi olmadan müşahidə edəcək. Onun vəzifəsi potensial təhlükəli asteroid və kometləri tapmaqdır. Bütün məlumatlar ESA Koordinasiya Mərkəzinə göndəriləcək və burada emal olunacaq. Əgər təhlükəli obyekt aşkar olunarsa, onun trayektoriyası dəqiqləşdiriləcək və lazım gələrsə, Yerətrafı bütün məlum obyektlərin Beynəlxalq Astronomiya İttifaqı tərəfindən təsis olunmuş məlumat bazası olan Cırtdan Planetlər Mərkəzinə yönləndiriləcək.
Teleskop bu ay ərzində Siciliyada yerləşən Monte Mufara Rəsədxanasına təhvil veriləcək. Dəniz səviyyəsindən 1865 metr yüksəklikdə yerləşən bu rəsədxana, “ATLAS” teleskopu, “Zwicky Transient Facility” və hazırda inşa olunan “Vera Rubin” teleskopu da daxil olmaqla, qlobal astronomik müşahidə şəbəkəsinin bir hissəsi olacaq. Belə ki, gələcəkdə şimal və cənub yarımkürələri arasında bərabər paylanmış dörd belə teleskopdan ibarət şəbəkənin yaradılması planlaşdırılır. Bu, müşahidələrin dəqiqliyini və müntəzəmliyini artıraraq, hava şəraitindən asılılığı azaldacaq. Potensial təhlükə nə qədər tez aşkar edilərsə, təhlil və tədbirlər üçün bir o qədər çox vaxt olacaq. Qeyd edək ki, “Flyeye-1” teleskopu 2016-cı ildə layihələndirilib və bu il rəsmi olaraq istifadəyə verilib. 2028-ci ildə isə “Flyeye-2” teleskopunun fəaliyyətə başlaması planlaşdırılır, ikinci teleskopun Cənub yarımkürəsində yerləşdirilməsi nəzərdə tutulur.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
