Aprelin 6-da AMEA N.Tusi adına Şamaxı Astrofizika Rəsədxanasının Bakı bölməsində növbəti astroseminar keçirilib.
Tədbiri giriş sözü ilə açan Şamaxı Astrofizika Rəsədxanasının elmi işlər üzrə direktor müavini, f-r.ü.f.d Elçin Babayev astroseminar haqqında tədbir iştirakçılarına məlumat verib.
Sonra AMEA Fizika İnstitutunun elmi işçisi Günel Məmmədxanova “Orion dumanlığı proplidlərinin səthi fotometriyası: I. Metodik hissə” mövzusunda (N.Z.İsmayılov, G.B.Məmmədxanova) məruzəsini təqdim edib.
Məruzəçi qeyd edib ki, Böyük Orion Dumanlığı (BOD) (NGC 1976, M42) ulduzəmələgəlmə prosseslərinin, ulduz təkamülünün erkən mərhələlərində baş verən fiziki prosseslərin öyrənilməsi üçün unikal oblastdır. Bu dumanlıqda parlaq OB ulduzların şüalanmasının təsirilə formalaşan böyük НII oblastları var.
G.Məmmədxanova bildirib ki, Oriondakı parlaq ulduz oblastlarından Trapesiya ulduzlarını misal göstərmək olar: “Dumanlığın yaxın infraqırmızı (İQ) diapazonda alınmış təsvirləri həmin ulduzlardan 1 pc məsafədə çoxlu sayda formalaşmaqda olan cavan ulduzların toplandığını aşkar etməyə imkan vermişdir. İlk dəfə belə obyektləri O’Dell və b. (1993) “proplidlər”–protoplanet diskləri adlandırmış və onların ümumi xarakteristikalarını təsvir etmişdir. Proplidlər cavan ulduz obyektləri ətrafında olan–işıqsaçan ulduzətrafı disklərdir. Onlar: 1–CUO ətrafında olan ulduzətrafı diskdən, 2–qövsvarı parlaq baş hissədən, 3–dayanıqlı zərbə cəbhəsindən, 4–quyruqdan ibarətdir. BOD-da isti ulduzlardan gələn ultrabənövşəyi şüalanmaya məruz qalan protoplanet disklərdə planetlərin formalaşması, adi ulduzlararası mühitdə planetəmələgəlmə prosseslərindən əhəmiyyətli dərəcədə fərqlənməlidir”
Məruzə tədbir iştirakçıları tərəfindən maraqla qarşılanıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
