May ayının 14-də Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.
Seminara rəhbərlik edən AMEA-nın müxbir üzvü Namiq Cəlilov iştirakçıları salamlayıb və onlara məruzənin mövzusu haqqında məlumat verib.
Sonra ŞAR-ın Moskva Aviasiya İnstitutunun doktorantı Elvin Abbasov “Maşın dili üsullarının və süni intellektin astronomik tədqiqatlara tətbiqi: Şamaxı Astrofizika Rəsədxanası üçün perspektivlər” mövzusunda məruzə ilə çıxış edib.
Məruzəçi seminarda bildirib ki, müasir astronomiyada toplanan böyük həcmli müşahidə materiallarının emalı və təhlili üçün yeni və daha səmərəli yanaşmaların tətbiqinə ehtiyac vardır. Şamaxı Astrofizika Rəsədxanasında aparılan elmi tədqiqatların potensialını əhəmiyyətli dərəcədə artıracaq maşın dili (ML) və süni intellekt (AI) metodlarının tətbiqinin əsas istiqamətlərindən danışan, natiq, nümunə kimi, bir neçə elmi nəşrə əsaslanaraq qalaktikaların avtomatik təsnifat sistemini təqdim edib. Rəsədxananın tədqiqat praktikasında ML/AI metodlarının inteqrasiyası üzrə təşəbbüs planı, təklif olunan alqoritmlərin iş prinsiplərinin izahı və gözlənilən elmi nəticələr ətraflı şəkildə şərh edilib.
Çıxışın sonunda mövzu ətrafında geniş müzakirə aparılıb, seminar iştirakçılarını maraqlandıran suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
