Kosmik hava durumu – Hesabat dövrü ərzində Günəşin fəallığı zəifləyərək, əsasən C sinif alışmalar baş vermişdir. Maksimal sinifli alışma isə M1.9 sinifli alışma olmuşdur. Alışmalara bağlı olaraq radiosiqnalların ötürülməsində R1 səviyyəli fasilələr, Tac Kütlə Atılmaları (TKA) qeydə alınmışdır. Günəşin səthində ləkələrin sayı artaraq 11ləkə qrupunda 119 ləkə və Tac Dəlikləri müşahidə olunur.

Enerjisi 2 MeV-dən çox olan elektron seli hesabat dövrü ərzində 1439 pfu-dək yüksəlmiş, 10 MeV-dən çox enerji yüklü proton seli isə fon səviyyəsində olmuşdur.

Hesabat dövründə Günəş küləyinin maksimal sürəti 745 km/san–dək artmışdır. Yer orbitində planetlərarası maqnit sahəsinin maksimal qiyməti 18 nT, radial istiqamətdə isə -14 nT olmuşdur. Hal-hazırda Günəş küləyinin sürəti 401 km/san planetlərarası maqnit sahəsinin maksimal qiyməti 5.81 nT, radial istiqamətdə isə 5.51 nT təşkil edir.

Hesabat dövründə 21 aprel tarixlərində Günəşin fəallığına bağlı olaraq G1-G2 səviyyəli geomaqnit qasırğası qeydə alınmışdır. Hal-hazırda geomaqnit sahəsinin fəallığını ifadə edən Kp indeksi 0.5-ə bərabərdir və kosmik hava sakitdir.  

Kosmik hava proqnozu – Proqnoz günlərində (28 aprel-04 may) C sinif alışmanın baş verməsi ehtimalı 99%, M (R1-R2) sinif alışmanın baş verməsi ehtimalı 10%, X (R3) sinif alışmanın baş verməsi ehtimalı isə 1% təşkil edir.

Enerjisi 2 MeV-dən çox olan elektron selinin yenidən üksələcəyi, 10 MeV-dən çox enerji yüklü proton selinin isə fon səviyyəsində  qalacağı proqnozlaşdırılır.   

Günəş küləyinin sürətinə müsbət qütblü Tac Dəliyi Axınlarının təsiri gözlənilir.  

Avroraların müşahidə olunması ehtimalı isə yüksək qütb dairələrində 15-45%, orta qütb dairələrində isə 30-1%-dir.

Geomaqnit sahəsinin müsbət qütblü Tac Dəliyi Axınlarınının təsiri ilə 29 aprel tarixinədək aktiv olacağı, sonra isə sakitləşəcəyi gözlənilir. 01-02 may tarixlərinə isə aktivliyin G1 səviyyəsinədək artması ehtimalı var.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.