Kosmik hava durumu – Hesabat dövrü ərzində Günəş fəallığı əvvəlki tempdə qalaraq, əsasən M sinif alışmalar qeydə alınmışdır. Maksimal sinifli alışma isə M4.4 sinifli alışma olmuşdur. Alışmalara bağlı olaraq II tip radioemissiya, radiosiqnalların ötürülməsində R1 səviyyəli fasilələr, Tac Kütlə Atılmaları (TKA) qeydə alınmışdır. Günəşin səthində ləkələrin sayı artaraq 7 ləkə qrupunda 114 ləkə və cənub yarımkürəsində böyük ölçüdə Tac dəliyi müşahidə olunur.
Enerjisi 2 MeV-dən çox olan elektron seli hesabat dövrü ərzində 2379 pfu-dək yüksəlmiş, 10 MeV-dən çox enerji yüklü proton seli isə fon səviyyəsində olmuşdur.
Hesabat dövründə Günəş küləyinin maksimal sürəti 663 km/san-dək artmışdır. Yer orbitində planetlərarası maqnit sahəsinin maksimal qiyməti 11 nT, radial istiqamətdə isə -11 nT olmuşdur. Hal-hazırda Günəş küləyinin sürəti 418 km/san planetlərarası maqnit sahəsinin maksimal qiyməti Yer orbitində 15.83 nT, radial istiqamətdə isə 4.97 nT təşkil edir.
Hesabat dövründə 15-16 aprel tarixlərində Günəşin fəallığına bağlı olaraq G1-G4 səviyyəli geomaqnit qasırğası baş vermişdir. 18-20 aprel tarixlərində isə kosmik hava şəraiti aktiv olmuş və fasilələrlə G1 səviyyəsinə yüksəlmişdir. Hal-hazırda geomaqnit sahəsinin fəallığını ifadə edən Kp indeksi 4-ə bərabərdir və kosmik hava aktivdir.
Kosmik hava proqnozu – Proqnoz günlərində (21-27 aprel) C sinif alışmanın baş verməsi ehtimalı 99%, M (R1-R2) sinif alışmanın baş verməsi ehtimalı 40%, X (R3) sinif alışmanın baş verməsi ehtimalı isə 5% təşkil edir.
Enerjisi 2 MeV-dən çox olan elektron selinin yenidən yüksələcəyi, 10 MeV-dən çox enerji yüklü proton selinin isə fon səviyyəsində olacağı proqnozlaşdırılır.
Günəş küləyinin sürətinin müsbət qütblü Tac Dəliyi Axınlarının təsiri ilə artacağı gözlənilir.
Avroraların müşahidə olunması ehtimalı isə yüksək qütb dairələrində 15-20%, orta qütb dairələrində isə 1-15%-dir.
Geomaqnit sahəsi – Müsbət qütblü Tac Dəliyi Axınlarınının təsiri ilə 22-24 aprel tarixlərinə G1-G2 səviyyəli geomaqnit qasırğası proqnozlaşdırılır.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
