Aprel ayının 16-da Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.

Seminara rəhbərlik edən AMEA-nın müxbir üzvü Namiq Cəlilov iştirakçıları salamlayıb və onlara məruzənin mövzusu haqqında məlumat verib.

Sonra ŞAR-ın “Ulduz atmosferləri fizikası və maqnetizm” şöbəsinin aparıcı elmi işçisi, fizika-riyaziyyat üzrə fəlsəfə doktoru, dosent Əliqulu Xəlilov “HD 190603 (B1.5Ia) ifratnəhəng ulduzun atmosferində qeyri-stasionar proseslər” mövzusunda məruzə ilə çıxış edib.

Təqdim olunan işdə HD190603 ifratnəhəng ulduzunun 2010-2019-cu il tarixlərində N.Tusi adına Şamaxı Astrofizika Rəsədxanasının 2-m teleskopunda alınmış spektrlər əsasında Hα, H_β və HeI xətlərinin profillərinin dəyişməsi və spektral parametrləri tədqiq olunmuşdur. Müəyyən edilmişdir ki, HD190603 ifratnəhəng ulduzunun spektrində Hα, H_β və HeI xətlərinin profillərinin forması, şüa sürəti və ekvivalent eni zamandan asılı olaraq dəyişir. Hα, H_β və HeI xətlərinin profili udulma və şüalanma komponentlərindən ibarətdir. Hα xəttinin şüalanma komponentinin profili zamandan asılı olaraq bir, iki və ya üç komponentdən ibarət müşahidə olunur. Həmçinin, Hα xətti profilində absorbsiya komponentinin kəsilməz spektr səviyyəsinə qədər zəifləməsi, yox olması və yenidən yaranması, Hα xətti profilinin tam şüalanmada müşahidə olunması kimi unikal müşahidə faktı aşkar olmuşdur.

Müəyyən edilmişdir ki, Hα, Hβ xətlərinin udulma və şüalanma komponentlərinin şüa sürəti və ekvivalent eni, həmçinin HeI xətlərinin udulma və şüalanma komponentlərinin ekvivalent eni təxminən 100-120 günlük periodla dəyişir.

Çıxışın sonunda mövzu ətrafında geniş müzakirə aparılıb, seminar iştirakçılarını maraqlandıran suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.