Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasının (ŞAR) Gənc Alim və Mütəxəssislər Şurasının (GAMŞ) növbəti astroseminarı keçirilib.

Tədbiri astronomiya üzrə fəlsəfə doktoru Ülkər Rüstəm giriş sözü ilə açaraq, iştirakçıları salamlayıb və onlara məruzənin mövzusu haqqında məlumat verib.

Sonra Şamaxı Astrofizika Rəsədxanasının doktorantı Bənövşə Əsgərova "Kiçik səma cisimlərinin Yupiterə təsirinin dinamikası" mövzusunda məruzə ilə çıxış edib.

Məruzəçi seminarda bildirib ki, Günəş sisteminin nəhəng planetləri daxili enerjiyə malikdir və bu enerjinin mənbəyi və miqdarı onların təkamülünü anlamaq üçün çox vacibdir. Bu enerjinin mənbəyini müəyyən etmək üçün yalnız planetləri deyil, həm də planetlərlə qarşılıqlı təsirə girə biləcək səma cisimlərini araşdırmaq lazımdır. Məsələn, planetlərin peykləri və kiçik səma cisimləri də bu təsirlər arasında yer alır.

Təqdim olunan işdə Yupiterlə qarşılıqlı təsirdə ola biləcək kiçik səma cisimlərinin sayı qiymətləndirilmişdir. Bu cisimlərə uzun və qısa periodlu kometlər, damakloidlər və s. daxildir. Kiçik səma cisimlərinin ehtimalını qiymətləndirərkən Yupiterin təsir dairəsinə və Roş sərhədinə düşən cisimlərin orbital parametrlərinə əsaslanaraq minimal orbit məsafələri hesablanmışdır. Elliptik, parabolik, hiperbolik kometlər və damakloidlər üçün əldə olunmuş nəticələr ətraflı şəkildə şərh edilmişdir.

Seminar iştirakçıları tərəfindən maraqla qarşılanan məruzənin sonununda mövzu ətrafında geniş müzakirələr aparılıb, iştirakçıları maraqlandıran suallar cavablandırılıb. 

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.