Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasının (ŞAR) Gənc Alim və Mütəxəssislər Şurasının (GAMŞ) növbəti astroseminarı keçirilib.
Tədbiri astronomiya üzrə fəlsəfə doktoru Ülkər Rüstəm giriş sözü ilə açaraq, iştirakçıları salamlayıb və onlara məruzənin mövzusu haqqında məlumat verib.
Sonra Batabat Astrofizika Rəsədxanasının elmi işçisi Faidə Hüseynova "Massiv Herbig Ae/Be ulduzlarının kiçik ayırdetməli spektrlərinin tədqiqi" mövzusunda məruzə ilə çıxış edib.
Məruzəçi seminarda Herbig Ae/Be (HAeBe) tipli cavan ulduzların əsas xarakteristikalarını qısa şəkildə təqdim edərək, son illərdə Gaia tərəfindən alınmış yeni obyektlərin xassələrini diqqətə çatdırıb. Gaia müşahidə materiallarından alınan nəticələrə əsasən Herbig tip cavan ulduzların 3 əsas kriteriyasının spektral və fotometrik xüsusiyyətlərinin tədqiqində əhəmiyyətli rol oynadığını vurğulayıb. O qeyd edib ki, Herbig Ae/Be cavan ulduzlarının əksəriyyətində İQ diapozonda nəzərə çarpacaq dərəcədə geniş toz şüalanma artıqlığı müşahidə edilir ki, bu da ulduzun ətrafında qaz-toz diskinin mövcüdluğunu sübut edir.
Seminar iştirakçıları tərəfindən maraqla qarşılanan məruzənin sonununda mövzu ətrafında geniş müzakirələr aparılıb, iştirakçıları maraqlandıran suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
