Kosmik hava durumu – Hesabat dövrü ərzində Günəşin fəallığı bir qədər artmışdır. Maksimal sinifli alışma 4001 oblastındakı X2.03 sinifli alışma olmuşdur. Alışmalara bağlı olaraq II tip radioemissiya, 10 sm dalğa uzunluğunda radioalışmalar, radio siqnalların ötürülməsində R2-R3 səviyyəli fasilələr və bir neçə Tac Kütlə Atılmaları (TKA) qeydə alınmışdır. Günəşin səthində ləkələrin sayı azalaraq 12 ləkə qrupunda 186 ləkə və Tac dəlikləri müşahidə olunur.
Enerjisi 2 MeV-dən çox olan elektron seli həftə ərzində 4784 pfu-dək yüksəlmişdir. 10 MeV-dən çox enerji yüklü proton seli isə fon səviyyəsində olmuşdur.
Hesabat dövründə Günəş küləyinin maksimal sürəti 619 km/san–dək artmışdır. Yer orbitində planetlərarası maqnit sahəsinin maksimal qiyməti 11 nT, radial istiqamətdə isə -9 nT olmuşdur. Hal-hazırda Günəş küləyinin sürəti normaldır (318 km/san) planetlərarası maqnit sahəsinin maksimal qiyməti 13.19 nT, radial istiqamətdə isə 8.95 nT təşkil edir.
Hesabat dövründə 18-19 fevral tarixlərində G1 səviyyəli geomaqnit qasırğası müşahidə olunmuşdur. Hal-hazırda geomaqnit sahəsinin fəallığını ifadə edən Kp indeksi 3.3-ə bərabərdir və kosmik hava qeyri-sabitdir.
Kosmik hava proqnozu – Proqnoz günlərində (24 fevral-2 mart) C sinif alışmanın baş verməsi ehtimalı 99%, M (R1-R2) sinif alışmanın baş verməsi ehtimalı 65%, X (R3) sinif alışmanın baş verməsi ehtimalı isə 15% təşkil edir.
Enerjisi 2 MeV-dən çox olan elektron seli yüksələ bilər. Həmçinin 10 MeV-dən çox enerji yüklü proton selinin isə S1 səviyyəsinin altında olacağı proqnozlaşdırılır.
Günəş küləyinin sürətinin mənfi qütblü Yüksək Sürətli Tac Dəliyi Axınlarının və 19 fevralda baş vermiş TKA-nın təsiri ilə artacağı gözlənilir.
Avroraların müşahidə olunması ehtimalı isə yuxarı coğrafi enliklərdə 25%, orta coğrafi enliklərdə isə 5%-dir.
Geomaqnit sahəsi – Mənfi qütblü Yüksək Sürətli Tac Dəliyi Axınlarınının və 19 fevralda baş vermiş TKA-nın təsiri ilə geomaqnit sahəsinin sakit və qeyri-sabit olacağı gözlənilir.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
