Bu gün Azərbaycan Respublikası Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasının (ŞAR) aparıcı elmi işçisi, fizika-riyaziyyat üzrə fəlsəfə doktoru, dosent Əliqulu Xəlilovun 70 yaşı tamam olur.
Əliqulu Mustafa oğlu Xəlilov, 10 fevral 1955-ci ildə Azərbaycan Respublikası,Şamaxı şəhərində, anadan olmuşdur. O, 1962-ci ildə Şamaxı şəhəri 6 nömrəli məktəbin 1-ci sinfinə getmiş, 1970-ci ildə isə Bakı şəhərində yerləşən 1 nömrəli fizika-riyaziyyat təmayüllü litseyə daxil olmuşdur. 1972-ci ildə həmin məktəbi bitirib, Azərbaycan Dövlət Universitetinin (indiki Bakı Dövlət Universiteti) fizika fakültəsinə daxil olmuşdur.
1977-ci ildə Azərbaycan Dövlət Universitetinin fizika fakültəsini astronomiya ixtisası üzrə bitirərək, həmin ildən təyinatla N.Tusi adına Şamaxı Astrofizika Rəsədxanasında elmi fəaliyyətə başlamış və həmin vaxtdan ŞAR-da elmi tədqiqatla məşğuldur.
1981-1983-cü illərdə Ukraynanın Krım Astrofizika Rəsədxanasında praktik astrofizika sahəsində akademik A.A.Boyarçukun rəhbərliyi altında təcrübə keçirmişdir. Bu illər ərzində ulduz atmosferinin model vasitəsilə tədqiq olunması ilə məşğul olmuşdur. Alınmış nəticələr məqalə şəklində çapdan çıxmışdır.
Sonrakı illərdə ŞAR-ın 2-m teleskopunda B, A və F tipli ifratnəhəng ulduzların, o cümlədən Qalaktikanın kimyəvi təkamülünün öyrənilməsində mühüm yer tutan, yüksək enlikdə yerləşən, ifratnəhəng ulduzların tipik nümayəndəsi olan 89Her və HD 161796 ulduzlarının müntəzəm spektral müşahidələrini aparmış və bu obyektlərin tədqiqi sahəsində bir sıra yeni maraqlı elmi nəticələr əldə etmişdir.
Ə.M.Xəlilov 14 noyabr 2009-cu il tarixində 01.03.02 – astrofizika, radioastronomiya ixtisası üzrə “A və F spektral sinifli ifratnəhəng ulduz atmosferlərinin spektral tədqiqi” mövzusunda namizədlik dissertasiyasını müvəffəqiyyətlə müdafiə etmiş və 2010-cu ildə Azərbaycan Respublikası Prezidenti yanında Ali Attestasiya Komissiyası tərəfindən fizika üzrə Fəlsəfə Doktoru elmi dərəcəsi diplomunu almışdır.
13 sentyabr 2017-ci ildə Azərbaycan Respublikası Prezidenti yanında Ali Attestasiya Komissiyası tərəfindən ona astrofizika və ulduz astronomoiyası ixtisası üzrə Dosent elmi adı verilmişdir.
Hal-hazırda seçilmiş B, A, F spektral sinifli nəhəng və ifratnəhəng ulduzlarda baş verən qeyri-stasionar proseslərin, həmçinin bu ulduzların kimyəvi tərkibini öyrənmək məqsədi ilə ŞAR-ın 2m teleskopunda quraşdırılmış müasir işıq qəbulediciləri vasitəsi ilə onların spektral müşahidələrini davam etdirir.
Ə.M.Xəlilov qeyd olunan elmi istiqamətlər üzrə nüfuzlu elmi jurnallarda, həmçinin yerli və Beynəlxalq elmi konfransların materiallarında çap edilmiş 86 elmi məqalənin müəllifidir.
O, həm elmi, həm də elmi-ictimai fəaliyyəti ilə kollektivin dərin hörmətini qazanmışdır. Ailəlidir, iki övladı var.
Əməkdaşımızı 70 illik yubileyi münasibətilə təbrik edir, ona möhkəm cansağlığı, elmi fəaliyyətində yeni nailiyyətlər, tükənməz yaradıcılıq enerjisi arzulayırıq!
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
