Martın 14-də AMEA N.Tusi adına Şamaxı Astrofizika Rəsədxanasının (ŞAR) Bakı bölməsində növbəti astroseminar keçirilib.
Tədbiri giriş sözü ilə açan Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov astroseminar haqqında tədbir iştirakçılarına məlumat verib.
Sonra ŞAR-ın “Kosmik plazma və Heliogeofiziki problemlər”şöbəsinin kiçik elmi işçisi Rəcəb İsmayıllı "Astrofiziki maneələrin qeyri-bircins plazma axınında yaratdıqları akustik turbulensiyanın tədqiqi" mövzusunda məruzəsini təqdim edib.
R.İsmayıllı əvvəlcə Almaniyanın Siegen Universitetinə ezamiyyəti (20.10.2017-19.02.2018) zamanı keçdiyi təcrübədən danışıb. O, səfər çərçivəsində Siegen Universitetinin “Axın mexanikası” kafedrasında aparılan elmi tədqiqat işləri ilə yaxından tanış olduğunu bildirib:
“Səfər müddətində Linux əməliyyat sistemində Overture proqramı ilə bir neçə hidrodinamik məsələ nümunə olaraq modelləşdirilib. Məsələn, plazma kütləsinin dairəvi silindr üzərindən axını və həmin maneədən sonra yaranan fiziki proses ətraflı tədqiq edilib. Daha sonra superkomputerlərin köməyi ilə nümunələr paralel hesablama ilə yerinə yetirilib. Sonrakı mərhələdə sıxılan maye halı üçün Navye-Stoks tənliklərinin saxlanma formasının diskretləşmə üsulu ilə nəzərdə tutulan məsələ üçün Overture proqramında model qurulub...”
Məruzə tədbir iştirakçıları tərəfindən maraqla qarşılanıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
