Tusi-Bohm Planetariumda Azərbaycan Respublikası Elm və Təhsil Nazirliyi tərəfindən elan edilmiş “Təhsildə könüllü fəaliyyətin təşkili” qrant müsabiqəsi çərçivəsində dünyaca məşhur “Springer Nature” nəşriyyatının çap etdirdiyi “Fundamental astronomy” (Hannu Karttunen, Pekka Kröger, Heikki Oja, Markku Poutanen, Karl Johan Donner) kitabının azərbaycan dilinə tərcümə edilmiş variantının təqdimatı keçirilib. Təqdimat mərasimində N.Tusi adına Şamaxı Astrofizika Rəsədxanasının və Bakı Dövlət Universitetinin astronom alimləri, o cümlədən Həvəskar Astronomlar Cəmiyyətinin üzvləri iştirak edib.
Təqdimat mərasiminin açılışında ilk olaraq Həvəskar Astronomlar Cəmiyyəti İctimai Birliyi tərəfindən təqdim edilmiş və müsabiqədə qalib olmuş “Astronomiya olimpiadasının üstünlüyü: Azərbaycan dilində STEM təhsil” adlı layihənin rəhbəri Famil Mustafa tədbir iştirakçılarını salamlayıb, yaradılmış bu şəraitə görə Azərbaycan Respublikası Elm və Təhsil Nazirliyinin rəhbərliyinə, kitabın ərsəyə gəlməsində əziyyəti keçən bütün şəxslərə öz dərin təşəkkürünü bildirib.
Daha sonra tədbirə qatılan qonaqlar Bakı Dövlət Universitetinin “Astrofizika” kafedrasının müdiri f.-r.e.n., dosent Kəmalə Alışeva, kafedranın əməkdaşı f.ü.f.d, dosent Xıdır Mikayılov, AMEA-nın müxbir üzvü, N.Tusi adına Şamaxı Astrofizika Rəsədxanasının baş elmi işçisi f.-r.e.d., professor Əyyub Quliyev, “Həvəskar Astronomlar Cəmiyyəti” İB-nin sədri Faiq Nağıyev çıxış edərək azərbaycan dilinə tərcümə olunmuş bu kitaba böyük ehtiyacın olduğunu, onun vacibliyini vurğulayıblar. Gələcəkdə də bu istiqamətdə işlərin davamlı olmasını arzu ediblər. Qeyd edilib ki, bu kitabdan ali məktəblərdə müəllim və tələbə heyəti, Respublika və Beynəlxalq astronomiya olimpiadasına hazırlaşan şagirdlər, həmçinin astronomiyaya marağı olan digər şəxslər faydalana bilərlər.
Tədbirin sonunda layihə rəhbəri tərəfindən qonaqlara kitablar hədiyyə edilib.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
