27 noyabr 2024-cü il tarixdə N.Tusi adına Şamaxı Astrofizika Rəsədxanasının (ŞAR) elmi seminarında “Planetlər və kiçik səma cisimləri” şöbəsinin elmi işçisi Zabit Sabir oğlu Fərziyevin “Spektrin görünən oblastında nəhəng planetlərin atmosferlərindəki fiziki proseslərin NH3 və H2 molekulyar qazların udulma xətlərinə görə spektrofotometrik tədqiqi” mövzusunda astronomiya elm sahəsinin “Planetologiya” (2104.01) ixtisası üzrə təqdim edilmiş fəlsəfə doktoru dissertasiya işinin ilkin müzakirəsi keçirilib.
Elmi seminara rəhbərlik edən AMEA-nın müxbir üzvü, fizika-riyaziyyat elmləri doktoru Namiq Cəlilov iştirakçıları salamlayıb və onlara məruzənin mövzusu haqqında məlumat verib.
Təqdim edilən işdə nəhəng planetlərin atmosferində gedən fiziki prosesləri öyrənmək bu planetlərin atmosferində olan molekulyar qazların spektrofotometrik tədqiqi aparılmışdır. Bu məqsədlə Yupiter və Saturn üçün NH3 6475 Å, H2 (4-0) udulma zolaqları, Uran və Neptunda isə H2 (4-0), CH4 6800 Å udulma zolaqlarından istifadə edilmişdir. Həmin zolaqlardakı udulma xətlərinin formalaşdığı dərinlikdə fiziki şərait öyrənilmiş və yeni nəticələr alınmışdır.
Çıxışın sonunda rəyçilərin təklif və iradları dinlənilib, iddiaçı tərəfinən seminar iştirakçılarını maraqlandıran suallar cavablandırılıb və müvafiq tövsiyələr verilərək, işin müdafiyəyə təqdim olunmasına qərar verilib.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
