Noyabr ayının 5-də N.Tusi adına Şamaxı Astrofizika Rəsədxanasının (ŞAR) elmi seminarında “Qalaktikalar və ulduzəmələgəlmə prosesləri” şöbəsinin aparıcı elmi işçisi, dosent Həmayil Nadir qızı Adıgözəlzadənin “Ae/Be Herbiq ulduzlarının spektrində disk akkresiyası proseslərinin tədqiqi” mövzusunda astronomiya elm sahəsinin "Astrofizika və ulduz astronomiyası" (2108.01) ixtisası üzrə astronomiya elmləri doktoru doktoru elmi dərəcəsi almaq üçün təqdim edilmiş dissertasiya işinin ilkin müzakirəsi keçirilib.

Elmi seminara rəhbərlik edən AMEA-nın müxbir üzvü, fizika-riyaziyyat elmləri doktoru Namiq Cəlilov iştirakçıları salamlayıb və onlara məruzənin mövzusu haqqında məlumat verib.

Tədqiqat işində fırlanma oxu görüş istiqamətilə kiçik bucaq təşkil edən Ae/Be Herbiq tipli iki ulduz – HD 179218 və HD190073 ulduzlarının spektrində akkresiya (maddə axını) əlamətlərinin olub-olmadığı araşdırılmış, həmin ulduzlara maqnitosfer akkresiya modelinin tətbiq oluna bilmə imkanları nəzərdən keçirilmişdir. İddiaçı tərəfindən alınmış müşahidə materialları əsasında aparılmış tədqiqatlar nəticəsində sübut olunmuşdur ki, AeBe Herbiq tipli ulduzların atmosferində baş verən dəyişkənliyin əsas səbəbi ulduzla ulduzətrafı diskin qarşılıqı təsiri nəticəsində baş verən akkresiya prosesidir.

Çıxışın sonunda rəyçilərin təklif və iradları dinlənilib, iddiaçı tərəfinən seminar iştirakçılarını maraqlandıran suallar cavablandırılıb və müvafiq tövsiyələr verilərək, işin müdafiyəyə təqdim olunmasına qərar verilib.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.