Kosmik hava durumu – Hesabat dövrü ərzində Günəş fəllığı zəifləyərək, maksimal sinifli alışma M9.4 sinifli alışma olmuşdur. Alışmalara bağlı olaraq II tip radioemissiya və radiosiqnalların ötürülməsində R2 səviyyəli fasilə və 10 sm-lik dalğa uzunluğunda radioalışma qeydə alınmışdır. Günəşin səthində ləkələrin sayı azalaraq 5 ləkə qrupunda 83 ləkə müşahidə olunur. 

Enerjisi 2 MeV-dən çox olan elektron seli normal və orta səviyyədə, 10 MeV-dən çox enerji yüklü proton seli isə fon səviyyəsində olmuşdur.

Hesabat dövründə Günəş küləyinin maksimal sürəti 574 km/san–dək artmışdır. Yer orbitində planetlərarası maqnit sahəsinin maksimal qiyməti 16 nT, radial istiqamətdə isə -9 nT olmuşdur. Hal-hazırda Günəş küləyinin sürəti normaldır (370 km/san), planetlərarası maqnit sahəsinin maksimal qiyməti Yer orbitində 8 nT, radial istiqamətdə isə -1.5 nT təşkil edir.

Hesabat dövründə 25 noyabrda baş vermiş Tac Kütlə Atılmaları (TKA) səbəbli gözlənilən G1-G2 səviyyəli geomaqnit qasırğası baş verməmişdir. Plazma selinin təsiri zəif olub, 29 noyabrda geomaqnit sahəsinin fəallığı qısamüddətli G1 səviyyəsinə yüksəlmişdir. Hal-hazırda geomaqnit sahəsinin fəallığını ifadə edən Kp indeksi 2.3-ə bərabərdir və kosmik hava sakitdir.

Kosmik hava proqnozu – Proqnoz günlərində (02-08 dekabr) C sinif alışmanın baş verməsi ehtimalı  99%, M (R1-R2) sinif alışmanın baş verməsi ehtimalı 30%, X (R3) sinif alışmanın baş verməsi ehtimalı isə 5% təşkil edir.

Enerjisi 2 MeV-dən çox olan elektron selinin normal və orta, 10 MeV-dən çox enerji yüklü proton selinin isə fon səviyyəsində olması gözlənilir.  

Günəş küləyinin sürətinin 27 noyabrda baş vermiş TKA–nın təsiri ilə yüksələcəyi, 03-04 dekabrda isə nominal qiymətlərə geri dönəcəyi gözlənilir.

Geomaqnit sahəsinin sakit və qeyri-sabit səviyyələrdə olacağı proqnozlaşdırılır.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.