Artıq dördüncü ildir ki, Azərbaycan Respublikası Prezidenti İlham Əliyevin müvafiq sərəncamı ilə 27 sentyabr tarixi Azərbaycanın ərazi bütövlüyü uğrunda canlarını fəda etmiş şəhidlərimizin əziz xatirəsinin əbədiləşdirilməsi məqsədilə Anım Günü kimi qeyd olunur. Ölkəmizin bütün elm və təhsil müəssisələrində, o cümlədən Azərbaycan Respublikası Elm və Təhsil Nazirliyi N.Tusi adına Şamaxı Astrofizika Rəsədxanasında (ŞAR) Azərbaycan Respublikası Silahlı Qüvvələrinin şanlı qələbəsiylə nəticələnən 44 günlük haqq savaşımızın qəhrəmanlarına həsr olunan silsilə tədbirlər keçirilir.
Bu gün N.Tusi adına Şamaxı Astrofizika Rəsədxanasında keçirilən tədbirdə öncə Vətən Müharibəsi şəhidlərinin xatirəsi bir dəqiqəlik sükutla yad edilib. Elmi müəssisənin baş direktoru, AMEA-nın müxbir üzvü Namiq Cəlilov qeyd edib ki, Vətən müharibəsində qazanılan möhtəşəm zəfərin təfərrüatlarını, ən vacib məqamları təbliğ etmək, eləcə də şəhidlik zirvəsinə ucalan oğullarımızı tanıtmaq hər birimizin ümdə vəzifəsidir. Azərbaycanın cənnət məkanı Qarabağın azad edilməsi uğrunda mübarizədə xalqımızın ölkə rəhbəri və ordumuzla sarsılmaz birlik nümayiş etdirməsi sayəsində bu gün ərazi bütövlüyümüz tam bərpa olunub.
Bildirilib ki, o ağrılı-acılı günlərdə Şamaxı Astrofizika Rəsədxanası tərəfindən Silahlı Qüvvələr Fonduna ianə edilmiş, nəqliyyat və digər zəruri dəstək göstərilmiş, 30 ilə yaxın davam edən münaqişə ilə bağlı həqiqətlərin dünya elm ictimaiyyətinə çatdırılması üçün bütün beynəlxalq əlaqələr səfərbər edilmişdir. Beynəlxalq təşkilatlara, xüsusən də xarici elmi əməkdaşlara yüzlərlə rəsmi müraciət ünvanlanmış, münaqişənin real aspektləri dünya ictimaiyyətinin diqqətinə çatdırılmışdır. Müharibə başlayan gündən etibarən ordumuza dəstək olan rəsədxananın bir qrup əməkdaşı və övladları Vətən müharibəsində iştirak edərək düşmənlə üz-üzə cəbhədə mübarizə aparmışlar. Digər əməkdaşlar isə, xüsusən də gənc alim və mütəxəssislər informasiya mübarizəsində fəallıq nümayiş etdirmişlər.
Tədbirdə, həmçinin ölkəmizin ərazi bütövlüyünün təmin olunmasından sonra işğaldan azad olunmuş ərazilərdə həyata keçirilən quruculuq işlərindən, keçmiş məcburi köçkünlərin öz doğma yurdlarına qayıdışı və digər uğurlardan söz açılıb.
Tədbirə Şamaxı şəhərində yerləşən Şəhidlər Xiyabanının ziyarəti ilə yekun vurulub, qəhrəman şəhidlərimizin məzarları üzərinə tər çiçəklər düzülüb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
