Yaponiya Milli Astronomiya Rəsadxanasının tədqiqat qrupu Günəşdən 70-90 a.v (astronomik vahid) məsafədə Koyper qurşağına bənzər daha bir qurşaq kəşf ediblər. Onların fikrincə bu ya ayrıca bir qurşaqdır, ya da Koyper qurşağının bir hissəsidir.
Bizə ən yaxın göy cisimləri Günəş sisteminin daxilində yerləşsə də, çox kiçik cisimlər və strukturlar Günəşdən uzaqlaşdıqca qaranlıq və soyuq olduğuna görə tam müşahidə oluna bilmir. Günəş sistemi 8 əsas planetdən əlavə, asteroid, kometlərin toplaşdığı qurşaqlardan və Oort buludundan ibarətdir. Marsla Yupiterin arasında asteroid qurşağı, Neptundan sonra isə əksər kometlərin mənbəyi olan, kiçik buzlu daş parçalarından ibarət Koyper qurşağı yerləşir. Burada Pluton da daxil olmala Günəş sisteminin bir çox kiçik cisimləri məskunlaşıblar. Koyper qurşağı təxminən 20 a.v uzunluğunda sahəni əhatə edir. Bu uzaqlıqda yerləşən cisimlər Günəşin radiasiyası minimal olduğundan, yarandıqları ilk gündən indiyədək demək olar ki, dəyişməyərək 4.6 milyard il əvvəl Günəş sistemi yarandığı zamankı informasiyanı özlərində daşıyırlar.
Havay adalarında qurulmuş Subaru Teleskopu ilə Koyper qurşağının müşahidəsi nəticəsində 263 yeni obyekt aşkar olunub. Bu obyektlərdən 11-i Koyper qurşağının indiyədək məlum olan sərhədlərindən kifayət qədər uzaqda, Günəşdən təqribən 70 a.v məsafədə yerləşir. Alimlər Koyper qurşağının xarici sərhəddini ekstrapolyasiya edərək belə qərara gəliblər ki, onun sıxlığı daha bir qurşaq yaratmaq üçün kifayət qədər yüksəkdir. 55-70 a.v arasında isə heç bir obyekt aşkarlanmayıb. Tədqiqat qrupunun şərhinə görə, adətən müşahidə etdiyimiz bütün digər planet sistemlərində belə boşluq mövcuddur və bizim Koyper qurşağımız digər sistemlərlə müqayisədə çox kiçik görünür. Bu isə müşahidələrin qeyri-dəqiqliyi, bizim Günəş sisteminin kənarını tam müşahidə etmək imkanlarımızın məhdudluğu ilə bağlıdır.
Qeyd edək ki, tədqiqat işi “Planetary Science Journal”da çap olunmaq üçün qəbul olunub və arxiv serverində yerləşdirilib.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
