27-29 avqust tarixlərində Türkiyənin İstanbul Universitetinin ev sahibliyi ilə hibrid formada “9th International Conference on Control and Optimization with Industrial Applications (COIA-2024)” keçirilmişdir. Konfrans idarəetmə və optimallaşdırma sahəsində dünyanın müxtəlif ölkələrindən olan tədqiqatçı və praktikantlar üçün elmi nəticələri müzakirə etmək, fikir mübadiləsi aparmaq üçün faydalı platforma rolunu oynayır. Bununla yanaşı bu konfransda hər il bir sıra Fizika və Astronomiya sahəsində fəaliyyət göstərən alimlər iştirak edir və öz elmi təcrübələrini bölüşürlər. 2005-ci ildə Azərbaycanda start götürən COIA konfranslar silsiləsi uzun illərdir uğurla təşkil olunur. Hər il olduğu kimi bu ildə Azərbaycan Respublikası Elm və Təhsil Nazirliyi N.Tusi adına  Şamaxı Astrofizika Rəsədxanasının (ŞAR) əməkdaşları bu konfransda fəal iştirak ediblər.

Konfransda onlayn formada çıxış edən ŞAR-ın “Ulduz atmosferləri fizikası və maqnetizm” şöbəsində böyük elmi işçisi Ülkər Rüstəm “The atmosphere parameters of the star HD148743 (A7Ib)” mövzusunda elmi məruzə təqdim etmişdir. “Ulduz atmosferləri fizikası və maqnetizm” şöbəsinin ifratnəhəng ulduzlarla məşğul olan tədqiqat qrupunun  - astr.e.d., dos. Zahir Səmədov, f.ü.f.d., dos. Əliqulu Xəlilov, astr.ü.f.d. Ülkər Rüstəm və Aynurə Həsənovanın  birgə yerinə yetirdiyi  işdə  model üsulu ilə  A spektral sinifli ulduzun atmosferi tədqiq edilmiş,  HD148743 (A7IB) ulduzunun fundamental parametrləri-effektiv temperaturu, səthində ağırlıq qüvvəsinin təcili, mikroturbulent hərəkət sürəti və metallığı təyin edilmişdir. Ulduzun effektiv temperaturu və səthində ağırlıq qüvvəsinin təcili c₁, Q fotometrik indekslərinin və Hidrogenin Balmer seriyasının spektral xətlərinin ekvivalent enlərinin müşahidə  və nəzəri hesablanmış qiymətlərinin müqayisəsi əsasında təyin edilmişdir: T_eff = 7750 ± 150K, logg = 0.8 ± 0.2. FeII, TiII və CrII xətləri əsasında mikroturbulent hərəkət sürəti təyin edilmişdir. Uyğun olaraq ξ_t   = 6.0 ± 0.5km/s,  ξ_t   = ± 0.5 km/s, ξ_t= 6.4 ± 0.5 km/s qiymətləri alınmışdır. HD148743 (A7IB) ulduzunun atmosferində elementlərin miqdarı təyin edilərək, Günəşdə olan miqdarla müqayisə olunmuş, Na, N elementlərinin miqdarının artıqlığı aşkar edilmişdir. Yekun olaraq alınmışdır ki, kimyəvi tərkibinə görə HD148743 (A7IB) ulduzu Post AGB ulduzu deyil, adi ifratnəhəng ulduzdur.

Maraqla qarşılanan çıxışın sonunda konfrans iştirakçıların sualları məruzəçi tərəfindən cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.