Azərbaycan Respublikası Elm və Təhsil Nazirliyi, Naxçıvan MR Batabat Astrofizika Rəsədxanasının direktoru, astronomiya üzrə fəlsəfə doktoru, dosent Qulu Həziyev uzun sürən xəstəlikdən sonra vəfat etmişdir.

Qulu Əhməd oğlu Həziyev 15 yanvar 1954-cü ildə Şahbuz rayonu Biçənək kəndində anadan olub. Orta təhsilini 8-ci sinfə qədər Biçənək kənd 8 illik məktəbində, 9-10-cu sinfi isə  Aşağı Qışlaq kənd orta məktəbində alıb. Qulu Həziyev Ali təhsilini Azərbaycan Dövlət Universitetində (İndiki Bakı Dövlət Universiteti) almışdır. Ali təhsilini başa vurduqdan sonra 1977-ci ildə təyinatla Bərdə rayonuna göndərilmiş və 1979-cu ilin fevral ayına qədər Bərdə rayonunun Cumalar kənd 8 illik məktəbində müəllim işləyib. 1979-cu ilin aprel ayından 1995-ci ilə qədər Şamaxı Astrofizika Rəsədxanasının Şahbuz rayonu ərazisindəki Batabat bölməsində müxtəlif vəzifələrdə, 1995-ci ildən 2003-cü ilə qədər isə Batabat bölməsinin rəhbəri vəzifəsində çalışmışdır. 2003-cü ilin yanvar ayında AMEA Naxçıvan Bölməsi Batabat Astrofizika Rəsədxanasının direktoru vəzifəsinə təyin olunmuş və ömrünün sonuna kimi həmin vəzifədə çalışmışdır (2003-2023-cü illərdə AMEA Naxçıvan Bölməsi, 2023-2024-cü illərdə isə Elm və Təhsil Nazirliyi).

Uzun illər ərzində apardığı elmi tədqiqat işini (“Günəşdəki irimiqyaslı maqnit sahələrinin dövrü dəyişmələri” mövzusunda dissertasiya işini) 2007-ci ildə uğurla müdafiə edərək fizika-riyaziyyat elmləri namizədi alimlik dərəcəsi almış, 2015-ci ildə isə “Astrofizika və ulduz astronomiyası” ixtisası üzrə dosent elmi adı verilmişdir.

Qulu müəllim 2007-ci ildən (2016-2020-ci illər istisna olmaqla) Naxçıvan Dövlət Universitetinin fizika-riyaziyyat fakültəsinin "Ümumi və nəzəri fizika" kafedrasında pedaqoji fəaliyyətlə məşğul olmuşdur.

1979-cu ildən elmi fəaliyyətlə məşğul olan astronom alim 2 kitabın və 70-ə yaxın elmi məqalənin müəllifidir.

Qulu müəllimin ailəsinə və bütün yaxınlarına rəsədxana əməkdaşları adından dərin hüznlə başsağlığı verir, Allahdan rəhmət diləyirik.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.