Fevralın 28-də AMEA N.Tusi adına Şamaxı Astrofizika Rəsədxanasının Bakı bölməsində növbəti astroseminar keçirilib.
Tədbiri giriş sözü ilə açan Şamaxı Astrofizika Rəsədxanasının elmi işlər üzrə direktor müavini, f-r.ü.f.d Elçin Babayev astroseminar haqqında tədbir iştirakçılarına məlumat verib.
Sonra “Planetlər və kiçik səma cisimləri”şöbəsinin müdiri, f.ü.f.d Ədalət Ətayi “Nəhəng planetlərdə molekulyar hidrogen: Yupiter və Saturn”mövzusunda (Z.S.Fərziyev, Ə.Ə.Hümbətova) məruzəsini təqdim edib. O, qeyd edib ki, nəhəng planetlərin kütləsi əsasən hidrogendən ibarətdir və digər qazlar onların atmosferinin kiçik hissəsini təşkil edir. Bu planetlərin atmosferlərinin şüalandırdıqları enerji Günəşdən aldıqlarından daha çoxdur...
Ə.Ətayi bildirib ki, Şamaxı Astrofizika Rəsədxanasında aparılan spectral müşahidə zamanı Yupiter və Saturn planetlərinin səthinin müxtəlif detallarında molekulyar hidrogenin miqdarının müxtəlifliyi müəyyən edilmişdir: “Bu detallarda müxtəlif miqdarda enerji ayrılır ki, bu da Juno kosmik aparatının verdiyi təsvirləri izah etməyə kömək edir. Bundan əlavə, Yupiter və Saturn planetlərinin atmosferində molekulyar hidrogenin yeni bir zəif xətti də aşkarlanmış və digər xüsusiyyətlər araşdırılmışdır”.
Məruzə tədbir iştirakçıları tərəfindən maraqla qarşılanıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
