Kosmik hava durumu – Hesabat dövrü ərzində Günəşin fəallığı əvvəlki səviyyədə qalaraq, həftə boyunca M və X sinif alışmalar qeydə alınmışdır. Maksimal sinifli alışma 3767 regionunda qeydə alınan X1.7 sinifli alışmaolmuşdur. Alışmalara bağlı olaraq II tip radioemissiya və radiosiqnalların ötürülməsində R2-R3 səviyyəli fasilələr və 10 sm-lik dalğa uzunluğunda radioalışmalar qeydə alınmışdır. Günəşin səthində 11 ləkə qrupunda 194 ləkə müşahidə olunur. Həftə ərzində bir neçə Yerə istiqamətlənmiş komponentə malik Tac Kütlə Atılması (TKA) qeydə alınmışdır.
Enerjisi 2 MeV-dən çox olan elektron seli normal və orta səviyyədə olmuşdur, 10 MeV-dən çox enerji yüklü proton seli isə 05-06 avqustda S1 səviyyəsinə yüksəlmişdir.
Hesabat dövründə Günəş küləyinin maksimal sürəti 667 km/san,Yer orbitində planetlərarası maqnit sahəsinin maksimal qiyməti 21 nT, radial istiqamətdə isə -15 nT olmuşdur. Hal-hazırda Günəş küləyinin sürəti 510 km/san-dir, planetlərarası maqnit sahəsinin maksimal qiyməti 15.54 nT, radial istiqamətdə isə -14.06 nT təşkil edir.
Hesabat dövrü ərzində geomaqnit sahəsi sakit - aktiv səviyyələrdə olmuşdur. Gözlənilən TKA-ın təsiri nəticəsində 11 avqustdan G1(zəif) səviyyəsi ilə başlayan geomaqnit qasırğası, hal-hazırda G3 (güclü) səviyyəsinədək yüksəlmişdir və güclü geomaqnit qasırğası davam edir.
Kosmik hava proqnozu – Proqnoz günlərində (12 – 18 avqust) C sinif alışmanın baş verməsi ehtimalı 99%, M (R1-R2) sinif alışmanın baş verməsi ehtimalı 75%, X (R3) sinif alışmanın baş verməsi ehtimalı isə 30% təşkil edir.
Enerjisi 2 MeV-dən çox olan elektron selinin normal və orta səviyyədə olacağı, 10 MeV-dən çox enerji yüklü proton selinin isə 30-31 iyul tarixlərində S1 səviyyəsinə yüksəlməsi ehtimalı var.
Günəş küləyinin sürətinin 08 və 10 avqustda baş vermiş TKA-ın təsiri nəticəsində yüksək olacağı proqnozlaşdırılır.
Geomaqnit sahəsi - Hal-hazırda geomaqnit qasırğası davam edir və geomaqnit sahəsinin 13-14 avqustda sakit səviyyəyə dönəcəyi gözlənilir. Sonrakı günlərdə geomaqnit qasırğası proqnozlaşdırılmır.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
