07 avqust tarixində N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib.

Seminara rəhbərlik edən professor Nəriman İsmayılov iştirakçıları salamlayıb və onlara məruzənin mövzusu haqqında məlumat verib.

ŞAR-ın “Ulduz atmosferləri fizikası və maqnetizm” şöbəsinin elmi işçisi astr.ü.f.d Ülkər Rüstəm “Nüvə astrofizikasının əsasları” mövzusunda məruzə ilə çıxış etmişdir.

Məruzədə nüvə astrofizikası, astrofizikanın bir sahəsi olaraq, ulduzların və digər astrofizik obyektlərin daxilində baş verən nüvə prosesləri, kainatın kimyəvi tərkibi, ulduzların enerji mənbələri və kosmik hadisələrin dinamikasından bəhs olunub. Massiv ulduzların daxilində və ya CNO dövrü ilə gedən reaksiyalar, ağır elementlərin sintezi baş verir. Nüvə sintezi nəticəsində və ya ifratyeni partlayışlarında dəmir, nikel və digər ağır elementlər yaranır. Bu proseslər kainatdakı elementlərin müxtəlifliyi nüvə astrofizikasında nəzəri modellər və kompüter simulyasiyaları ulduzların təkamülü, ifratyeni partlayışları və digər nüvə proseslərini anlamağa kömək edir.

Nüvə astrofizikası sahəsi, ulduzların, qalaktikaların və ümumiyyətlə kainatın təkamülünü daha yaxşı anlamaq üçün çox mühüm bir sahədir. Bu sahədə aparılan tədqiqatlar, həmçinin, kosmologiya, zərrəcik fizikası, nəzəri fizika və kimya kimi digər elmi sahələrə də töhfə verir.

Ulduzların kimyəvi tərkibi ilə məşğul olan məruzəçi elmi fəaliyyətini bu sahədə davam etdirməyi planlaşdırır. 

Çıxışın sonunda mövzu ətrafında geniş müzakirələr aparılaraq, seminar iştirakçılarını maraqlandıran suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.