Əkrəm Əhməd oğlu Aslanov 10 sentyabr 1954-cü ildə Zaqatala rayonunda anadan olmuşdur. 1971-1976 –cı illərdə Azərbaycan Dövlət Universitetinin (ADU) Fizika fakültəsini astrofizika ixtisası üzrə bitirib təyinatla Şamaxı Astrofizika Rəsədxanasına işə göndərilmişdir. O, ADU-nun astrofizika kafedrasının ilk məzunlarından biri olub. 1977-ci ildə M. Lomonosov adına Moskva Dövlət Universitetinin yanında P.Şternberq adına Dövlət Astronomiya İnstitutuna akademik A.M.Çerepaşukun məktəbində ixtisasartırma kursuna ezam olunur. 1978-1981-ci illərdə MDU –nun aspiranturasında təhsil alır. 1983-cü ildə akademik A.M.Çerepaşukun rəhbərliyi altında «İfrat böyük kütləli qoşa ulduzların təkamülünün son mərhələlərinin tədqiqi» mövzusunda namizədlik dissertasiyası müdafiə etmişdir. 1981-1990-cı illərdə MDU-nun nəzdində Dövlət Astronomiya İnstitutunda kiçik elmi işçi, daha sonra böyük elmi işçi vəzifələrində çalışmışdır. Ailə vəziyyəti ilə əlaqədar 1990-cı ildə Gəncə şəhərinə qayıtmışdır. 1990-1995-ci illərdə Gəncə Dövlət Universitetinin UTF və riyazi analiz kafedrasında müəllim, 1995-2015 ci illərdə GDU-nun İnformatika kafedrasının dosenti vəzifələrində işləmişdir. Əkrəm Aslanov MDU –da işlədiyi müddətdə Şamaxı Astrofizika Rəsədxanası ilə sıx əlaqə saxlamış, gənc kadrların Moskva Dövlət Astronomiya İnstitutunda ixtisasartırma kursu keçməsində böyük xidmətlər göstərmişdir. Əkrəm Aslanov Gəncə Dövlət Universitetində işlədiyi müddətdə də Şamaxı Astrofizika Rəsədxanası ilə əlaqələrini kəsməmiş, gənc kadrlara elmi-metodiki köməyini davam etdirmişdir, dissertasiya işlərinə rəy yazmış, rəsmi opponent olmuşdur.

 F.r.e.n., dos. Əkrəm Aslanov astrofizika sahəsində 60-dan artıq elmi məqalənin müəllifidir.

Böyük alim, səmimi, pozitiv bir insan kimi Əkrəm Aslanovun əziz xatirəsi onu tanıyanların qəlbində həmişə yaşayacaqdır.

Allah rəhmət eləsin!

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.