İyun ayının 21-də Azərbaycan Respublikası Elm və Təhsil Nazirliyinin Nəsirəddin Tusi adına Şamaxı Astrofizika Rəsədxanasında (ŞAR) Gənc Alim və Mütəxəssislər Şurasının (GAMŞ) növbəti genişləndirilmiş astroseminarı keçirilib.

Seminara rəhbərlik edən astronomiya üzrə fəlsəfə doktoru Ülkər Rüstəm seminarı giriş sözü ilə açaraq, tədbir iştirakçılarını salamlayıb və onlara məruzənin mövzusu haqqında məlumat verib. 

Sonra Şamaxı Astrofizika Rəsədxanasının “Qalaktikalar və ulduzəmələgəlmə prosesləri” şöbəsinin elmi işçisi Şəfəq İsmayılova “ŞAR-ın 2 m-lik teleskopunda UAGS+ANDOR spektroqrafında alınan müşahidə materiallarının emal edilməsi metodikası” mövzusunda məruzə ilə çıxış edib. 

Məruzəçi seminarda ŞAR-ın 2 metrlik teleskopunda quraşdırılmış spektroqraflarda (Yüksək ayırdetməli: “ShAFES - Shamakhy Fibre Echelle Spectrograph”, zəif ayırdetməli: “UAGS+ANDOR - Universal Astro Grating Spectrograph”) alınmış materialların DECH proqram paketi vasitəsi ilə emalını şərh edib və praktiki olaraq nümayiş etdirib.

Məruzə seminar iştirakçıları tərəfindən maraqla qarşılanıb. Çıxışın yekununda mövzu ətrafında geniş müzakirə aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.