Azərbaycan Respublikası Elm və  Təhsil Nazirliyi Nəsirəddin Tusi adına Şamaxı Astrofizika Rəsədxanasının (ŞAR) nəzdində fəaliyyət göstərən FD 1.39 Dissertasiya Şurasında “2108.01 – Astrofizika və ulduz astronomiyası” ixtisası üzrə ŞAR-ın “Ulduz atmosferləri fizikası və maqnetizm” şöbəsinin elmi işçisi Günay Məhərrəm qızı  Hacıyevanın  “Seçilmiş  A  və  F  spektral sinifli ulduzlarda qeyri-stasionarlıq və kimyəvi tərkib” mövzusunda dissertasiya işinin müdafiəsi keçirilib.

İclası Dissertasiya Şurasının sədri AMEA-nın müxbir üzvü, fizika-riyaziyyat elmləri doktoru Namiq Sərdar oğlu Cəlilov açaraq iştirakçıları salamlayıb və onlara dissertasiya işinin mövzusu haqqında məlumat verib.

İddiaçı çıxışında ifratnəhəng və nəhəng ulduzlara dair indiyədək görülmüş elmi-tədqiqat işlərinin nəticələrindən danışıb. Təqdim olunmuş işdə konkret olaraq seçilmiş 89 Her, HD 161796, φ Cas, 44 Cyg, HD 207260 və.s ifratnəhəng ulduzlarının ŞAR-ın 2 metrlik teleskopunda alınmış spektrləri əsasında bu ulduzların atmosferində baş verən qeyri-stasionar və periodik proseslərin analizindən alınmış hesablamaların nəticələri göstərilmişdir. Həmçinin seçilmiş A və F spektral sinifli ulduzların atmosferinin fundamental parametrləri: effektiv temperaturu, ağırlıq qüvvəsinin təcili və kimyəvi tərkibi təyin edilmişdir. Təkamül əyrilərindən istifadə etməklə ulduzların təkamül parametrləri: kütləsi, radiusu, işıqlığı təyin edilmişdir. İddiaçı tərəfindən praktiki olaraq müşahidələrdən alınmış nəticələrlə ulduzların müasir kimyəvi təkamül nəzəriyyəsinin mülahizələrinin doğruluğu təsdiq olunmuşdur.

Daha sonra rəyçilərə söz verilib, onların təklif və iradları dinlənilib. İddiaçı tərəfindən seminar iştirakçılarının sualları cavablandırıldıqdan sonra isə yerinə yetirilmiş fəlsəfə doktoru dissertasiya işinin qiymətləndirilməsi üçün gizli elektron səsvermə prosesinə keçid edilib. Səsvermənin nəticələrinə əsasən, Günay Hacıyevaya iddia edilən elmi dərəcənin verilməsi haqqında Azərbaycan Respublikasının Prezidenti yanında Ali Attestasiya Komissiyası qarşısında vəsatət qaldırılması yekdilliklə qəbul edilib.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.