Azərbaycan Respublikası Elm və Təhsil Nazirliyi Nəsirəddin Tusi adına Şamaxı Astrofizika Rəsədxanasının (ŞAR) nəzdində fəaliyyət göstərən FD 1.39 Dissertasiya Şurasının iclası keçirilib.

İclasda tanınmış xarici və yerli astrofiziklərdən təşkil olunmuş Dissertasiya Şurası üzvləri ilə yanaşı, müşahidəçi qismində ixtisasçı mütəxəssislər də iştirak edib.

Şamaxı Astrofizika Rəsədxanasının Baş direktoru, fizika-riyaziyyat elmləri doktoru, müxbir üzv Namiq Cəlilovun sədrliyi ilə keçirilən iclasda Bakı Mühəndislik Universitetinin dissertantı Həzi Ənvər oğlu Qasımovun “2104.01 - Planetologiya” ixtisası üzrə astronomiya üzrə fəlsəfə doktoru dərəcəsi almaq üçün təqdim etdiyi “Periodik kometlərin kinematik və statistik xüsusiyyətləri” mövzusunda dissertasiya işinin müdafiəsi olub.

İddiaçı dissertasiya işində görülən işlər, elmi yeniliklər və alınan əsas nəticələr barədə geniş və məzmunlu məlumat verib. Dissertasiya Şurasının üzvləri tərəfindən maraqla qarşılanan çıxışın sonunda iştirakçı alimlərin mövzu ilə bağlı sualları iddiaçı tərəfindən ətraflı formada cavablandırılıb.

Təqdim olunan iş Dissertasiya Şurası üzvləri tərəfindən yüksək qiymətləndirilib və iclasın sonunda gizli elektron səsvermə yolu ilə iddia edilən elmi dərəcənin verilməsi haqqında Azərbaycan Respublikasının Prezidenti yanında Ali Attestasiya Komissiyası qarşısında vəsatət qaldırılması yekdilliklə qəbul edilib.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.