May ayının 31-də Azərbaycan Respublikası Elm və Təhsil Nazirliyinin Nəsirəddin Tusi adına Şamaxı Astrofizika Rəsədxanasında (ŞAR) Gənc Alim və Mütəxəssislər Şurasının (GAMŞ) növbəti genişləndirilmiş astroseminarı keçirilib.

Seminara rəhbərlik edən astronomiya üzrə fəlsəfə doktoru Ülkər Rüstəm seminarı giriş sözü ilə açaraq, tədbir iştirakçılarını salamlayıb və onlara məruzənin mövzusu haqqında məlumat verib.

Sonra Şamaxı Astrofizika Rəsədxanasının “Ulduz atmosferləri fizikası və maqnetizm” şöbəsinin kiçik elmi işçisi Aytac İskəndərova “Massiv rentgen mənbələrinin tədqiqi” mövzusunda məruzə ilə çıxış edib.

Məruzəçi seminarda massiv rentgen qoşa sistemlərinin formalaşması və təkamülü, rentgen qoşa sistemlərin müşahidəsi və təsnifatı haqqında ətraflı məlumat verib. Bildirib ki, Astronomiyanın bir sahəsi olaraq rentgen astronomiyası göy cisimlərinin dalğa uzunluqları 0,001 ilə 100 Å intervalında dəyişən rentgen şüalarının emissiyasına əsaslanır.

Çıxış zamanı rentgen astronomiyasının inkişafına dair mühüm töhfələr verən ilk rentgen peykləri haqqında da danışan məruzəçi “Uhuru”, “Einstein”, “Röntgensatellite” (ROSAT), “Advanced Satellite for Cosmology and Astrophysics” (ASCA), “Rossi X-ray Timing Explorer” (RXTE), “BeppoSAX”, “X-ray Multi-Mirror-Newton” (XXM-Newton) və “Chandra” peyklərinin kosmik missiyaları və aldığı elmi nəticələri diqqətə çatdırıb.

Məruzə seminar iştirakçıları tərəfindən maraqla qarşılanıb. Çıxışın yekununda mövzu ətrafında geniş müzakirə aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.