Fevralın 21-də AMEA N.Tusi adına Şamaxı Astrofizika Rəsədxanasının Bakı bölməsində növbəti astroseminar keçirilib.
Tədbiri giriş sözü ilə açan Şamaxı Astrofizika Rəsədxanasının elmi işlər üzrə direktor müavini, f-r.ü.f.d Elçin Babayev astroseminar haqqında tədbir iştirakçılarına məlumat verib.
Sonra rəsədxananın “Qalaktikalar və ulduzəmələgəlmə prosesləri” şöbəsinin böyük elmi işçisi, f-r.ü.f.d İzzət Salmanov “Qalaktikalar haqqında ekspress informasiya” mövzusunda məruzəsini təqdim edib. Natiq vurğulayıb ki, ABŞ-ın Karnegi Elm İnstitutunun bir qrup tanınmış aliminin birgə tədqiqatlarının nəticəsində kainatda, bizdən 13 milyard işıq ili məsafədə ən uzaq kvazar aşkar edilib.. Bildirilib ki, kvazarın mərkəzindəki qara dəliyin kütləsi ifrat dərəcədə çox, 8108 G.k qədərdir və belə obyektin əmələ gəlməsi müasir kosmoqonik nöqteyi nəzərdən çox tezdir.
Daha sonra rəsədxananın “Qalaktikalar və ulduzəmələgəlmə prosesləri” şöbəsinin aparıcı elmi işçisi, f-r.ü.f.d Nazim Hüseynov “Qalaktikalar” mövzusunda məruzə ilə çıxış edib. Alim bildirib ki, qalaktikaların kəşfi kainatda zamana görə baş verən dəyişikliklərin tədqiqində və Kainatın yaranması haqqında yeni elmi dünyagörüşün formalaşmasında mühüm rol oynayıb.
N.Hüseynov qalaktikaların spektrində müşahidə olunan qırmızı sürüşmə haqqında da ətraflı məlumat verib: “Qalaktikaların spektrində qırmızı sürüşmənin və ardınca qalaktikaların bir-birindən uzaqlaşmasının ümumi qanununun kəşfi Kainatın genişlənən olmasını göstərdi. Bu kəşf yaranan və məhv olan dünyalar haqqında təsvvürün formalaşmasına, ümumən kosmologiya elminə böyük töhvələr verdi”.
Məruzələr tədbir iştirakçıları tərəfindən maraqla qarşılanıb, mövzular ətrafında müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
