Azərbaycan Respublikası Elm və Təhsil Nazirliyinin Nəsirəddin Tusi adına Şamaxı Astrofizika Rəsədxanasında (ŞAR) ilkin müzakirə iclası keçirilib.

İclasın gündəliyində olan məsələ ŞAR-ın “Planetlər və kiçik səma cisimləri” şöbəsinin elmi işçisi Fərziyev Zabit Sabir oğlunun 2104.01 – “Planetologiya”ixtisası üzrə “Spektrin görünən oblastında nəhəng planetlərin atmosferlərindəki fiziki proseslərin NH₃ və H₂  molekulyar qazların udulma xətlərinə görə spektrofotometrik tədqiqi” mövzusunda astronomiya üzrə fəlsəfə doktoru elmi dərəcəsi almaq üçün təqdim etdiyi dissertasiya işinin ilkin müzakirəsi olub.

Rəsədxananın icraçı direktoru, professor Nəriman İsmayılovun sədrliyi ilə keçirilən müzakirədə iddiaçı Zabit Fərziyev mövzu ilə əlaqədar əldə etdiyi və mühüm elmi yenilikləri diqqətə çatdırıb. Planet atmosferlərinin fiziki şəraitinin öyrənilməsinin bu planetlərin, və bütövlükdə Günəş sistemi cisimlərinin fiziki xüsusiyyətləri və təkamülünü öyrənmək üçün vacib olduğunu bildirib. O, qeyd edib ki, təqdim olunan dissertasiya işində 2014-2017-ci illər ərzində alınmış müşahidə materiallarına əsasən nəhəng planetlərin atmosferləri tədqiq olunmuşdur. Molekulyar amonyak qazının NH₃ λ6475Ả udulma zolagındakı spektral xətlərin intensivliyinin Yupiterin atmosferində meredian boyu, Saturnda isə diskin mərkəzində paylanması tədqiq olunmuşdur. Bundan başqa, nəhəng planetlərin atmosferlərində molekulyar hidrogenin H₂(4-0) udulma zolağına məxsus S(0) λ 6435.03 Å, S(1) λ6367.78 Ả spektral xətlərin parametrlərinə əsasən atmosferin fiziki şəraiti öyrənilmişdir.

Əldə olunmuş elmi nəticələrin fundamental elmi əhəmiyyətə malik olduğunu bildirən Zabit Fərziyev, çıxışının yekununda tədbir iştirakçılarının çoxsaylı suallarını da cavablandırıb.

İddiaçının çalışdığı elmi şöbənin müdiri, dissertasiya işinin elmi rəhbəri, fizika riyaziyyat üzrə fəlsəfə doktoru, dosent Ədalət Ətayi onun çıxışı zamanı rast gəldiyi təklif və iradları diqqətə çatdırıb, məruzə ətrafında rəy və tövsiyyələrini bildirib.

İclasın sonunda açıq səsvermə yolu ilə dissertasiya işinin nöqsanlar aradan qaldırıldıqdan sonra əsas Müdafiə Şurasına təqdim olunması qərara alınıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.